Mikil umsvif hjá Kárahnjúkaflugvelli Ómars.

Eitthvað hafa farið á milli mála umsvif Ómars á hálendinu. Hefur hann staðhæft að flugvélar hans séu með þeim sniðuga fídusi að för eftir þær sjáist ekki, einnig komi ekki för eftir bíla hans og þaðan af síður eftir skó hans. Nú hafa náðst myndir af lendingarsvæði hans og má ef grannt er skoðað sjá að umsvif á svæðinu eru snökktum meiri en talið hefur verið til þessa.

Paris örþreytt eftir að hafa lært mannganginn.

Hópurinn sem náði að frelsa Bobby Fisher á sínum tíma hefur tekið sér fyrir hendur nýtt verkefni. Þegar ljóst var að mannvinurinn Paris Hilton yrði sett á bak við lás og slá fyrir vestan hefur verið sett af stað mikil vinna í að frelsa hana og hefur Íslenskt ríkisfang verið afgreitt fyrir hana með hraði. Það eina sem ku vera í veginum er skortur hennar á almennri þekkingu á skáklistinni.

Verðbólgan grimm í heilbrigðiskerfinu.

"Hálfur annar milljarður sem stjórnvöld ætluðu í búsetuúrræði fyrir geðsjúka er að mestu uppurinn segir Kristófer Þorleifsson, formaður Geðlæknafélags Íslands. Peningarnir sem lofað var fyrir þremur árum hafi brunnið upp í verðbólgu og farið í skýrslugerð."

Nú verður einhver að segja mér, hvernig peningar brenna upp í verðbólgu. Verður einn og hálfur milljarður alltí einu milljarður? Mér er spurn.

Á öllum aldri?

Fyrst var það, BUGL, svo Impregilo og flensan, næst RUV með ríkisborgarabullið og svo þetta. Maður hélt nú að menn myndu passa sig eftir alla þessa skandala fréttamanna síðustu daga. Birtist svo ekki á bb.is mynd af manni á besta aldri í Fossavatnsgöngunni og myndtextinn "Keppendur í Fossavatnsgöngunni voru á öllum aldri" og greinilega gefið í skyn að umræddur maður sé háaldraður og vart við að búast að hann endurtaki þetta sökum elli. Gorgeir og Lýgteinstæn mótmæla þessu harðlega í nafni vandaðrar blaðamennsku.

Hvert skal halda?

Helgi Seljan var í morgunsárið sviptur ríkisborgararétti og gert að hypja sig af landi brott. Er þetta talinn lokahnykkurinn í aðgerðum leyniþjónustu Sjálfstæðisflokksins til að uppræta hina alræmdu Æskulýðsfylkingu Alþýðubandalagsins. Síðast var Robert Marshall gerður útlægur og gert að flytja til Vestmannaeyja. Er búist við að Helgi reyni að sækja um ríkisborgararétt í Guaetemala.

Erfitt hjá Jóni.

Heimsókn frambjóðenda Frjálslyndra í Alþjóðahúsið í gær lauk með ósköpum. Jóni Magnússyni varð af einhverjum ástæðum mjög bumbult í miðri framboðsræðu. Þaut hann út og skildi eftir sig stóran ælupoll á miðju bílastæði fatlaðra. Aðspurður hafði hann fáar skýringar á takteinum, en taldi þetta þó styðja margt í innflytjendastefnu flokksins. Ætlar hann að eyða síðustu dögum kosningabaráttunnar á fjöllum, fjarri fjölmenningarsamfélaginu.

Mikis Theodorakis

Mikis Theodorakis verður 82 ára 29.júlí á þessu ári ef hann meikar það þangað til. Fáir hafa haldið nafni hans betur á lofti en listamennirnir Gorgeir og Lygteinstæn. Frá heitum ströndum Portúgals til snjóbarinna hlíða Vestfjarða hafa þeir af djúpri tilfinningu túlkað angurvær lög hans á sinn einstaka hátt. Þjóðin kann þeim miklar þakkir fyrir og vonast til þess að fá að heyra perlurnar han Mikis sem oftast í þeirra flutningi.

Dauðþreyttir á misnotkuninni.

Samtök ferðamanna hafa sent frá sér harðorða yfirlýsingu vegna misnotkunar á þeim í kosningabaráttunni. Í yfirlýsingunni stendur: "Aftur og aftur erum við notaðir sem dæmi um auðsuppsprettu fyrir gráðuga Vestfirðinga. Mætti halda að við værum slíkir fábjánar að peningaveski okkar og krítarkort standi öllum opin til frjálsrar notkunar og til að styrkja byggð á þessum útnára. Við heitum því hér með að kaupa bensínið í Brú áður en haldið er á Vestfirði, kaupa matinn í Hyrnunni og nammið fyrir krakkana í Hreðavatnsskála og ekki voga ykkur að ota að okkur tilbúnum fornminjum eða Morranum." "Þar fyrir utan er enginn að segja að við ætlum til Vestfjarða yfir höfuð" klykkja þeir út með.

Balinn notaður í framtíðinni.

Gorgeir varð fyrir miklum gróðurhúsaáhrifum er hann fór í sitt daglega bað í gær. Hækkaði það hratt í baðinu að ekki gat verið um annað en gróðurhúsaáhrif að ræða. Lá honum við drukknun á köflum, en bjargaðist fyrir slysni uppúr þegar síst skyldi. Hafa gróðurhúsaáhrifasérfræðingar einmitt varað sterklega við þessu, sérstaklega ef börn eða gamalmenni eiga í hlut. Ætlar Gorgeir að fara öruggu leiðina í framtíðinni og nota gamla góða balann þar sem gróðurhúsaáhrif eru mun minni í honum að sögn sérfræðinga. Váin er því þegar farin að banka upphá hjá okkur Íslendingum og nægir að nefna hátt hitastig á Austfjörðum nú þegar álverið í Reyðarfirði hefur verið ræst.

Stór-iðjulaus Vestfirðingur - sáttur við lífið og tilveruna.

Gorgeir og Lygteinstæn vilja koma eftirfarandi á framfæri varðandi stóriðjumál á Vestfjörðum.

1. Vestfirðingar þurfa ekki að kjósa um það hvort hér eigi að rísa stóriðja, því þeir hafa aldrei ákveðið það í kosningu að vera stóriðjulausir. Eða misminnir okkur illilega, eða öfugt?

2. Hafi slíkt verið ákveðið, hver veit þá hvort um var að ræða stóriðjuleysi eða stór-iðjuleysi?

Hoppukastalinn vinsælastur

Vel heppnuðum landsfundi Samfylkingar er nú nýlokið og fóru menn ánægðir á braut. Var það mál manna að hoppukastalinn hefði verið lang skemmtilegasta atriðið á fundinum. Málefnastarfið var afgreitt með hraði þar sem biðraðir voru strax farnar að myndast við öll leiktæki. Þótti Össuri að vísu súrt hversu oft Ingibjörg Sólrún ruddist oft framfyrir í röðinni.

Nýjar höfuðstöðvar Glitnis. Skrifstofa Bjarna Ármanns lengst til hægri.

Eitthvað virðast nýjir aðaleigendur Glitnis banka hafa aðrar hugmyndir uppi um framtíðarhöfuðstöðvar bankans en  Bjarni Ármannsson. Skömmu eftir glæsilega kynningu Bjarna á væntanlegri nýbyggingu höfuðstöðva boðaði Hannes Smára og Jón Ássgeir til blaðamannafundar og var hann öllu styttri og íburðarminni en sá hjá Bjarna. Á meðfylgjandi mynd má sjá höfuðstöðvarnar sem þeir hafa í huga, teik itt or lív itt voru skilaboðin til Bjarna frá þeim.

Nappaðir!

Hækkun örorkubóta sem af flestum var talin ómerkileg kosningabrella Ríkisstjórnarinnar reyndist þegar upp var staðið úthugsuð brella hjá Tryggingastofnun og Félagsmálaráðuneyti til að nappa örorkubótaþega sem höfðu svindlað sér inná kerfið. Eins og sjá má á mynd sem tekin var á falda myndavél Tryggingastofnunar voru þeir eftir allt saman ekki svo miklir öryrkjar þegar þeir reyndu að teygja sig í bætur eftir hækkun.

Komu, sáu og sigruðu.

Það er óhætt að segja að gestir á Aldrei fór ég suður hafi rekið upp stór augu þegar Gorgeir og Lýgteinstæn mættu á svæðið í öllu sínu veldi. Var það mál manna að þeir hefðu engu gleymt og aldrei verið betri. Annað kom í ljós að tónleikunum loknum þegar Gorgeir hugðist aka í burtu. Hafði hann gleymt ljósunum á bílnum og allt rafmagn lekið út af geyminum. Er hann enn að væflast á mótssvæðinu engum til gagns, en áhugasömum bent á að taka með sér startkapla.